काठमाडौं- डेढ महिना अघि किर्तीपुर अस्पतालमा १४ वर्षीया मुस्कान खातुनको उपचार हुँदै थियो। तेजाब आक्रमणबाट बेडमा छटपटाइरहेकी उनलाई देश विदेशबाट प्रेरणादयी संदेशहरु आउन थाल्यो। त्यस्तो संदेश प्रवाह गर्नेमध्ये थिए बलिउडका विश्व चर्चित अभिनेता अमिताभ बच्चन अनि नवपुस्ता माझ लोकप्रिय वरुण धवन। त्यस्ता भिडियो मेसेजहरु मुस्कानलाई देखाउँदै , उनलाई हरपल हौसला प्रदान गर्दै उनी छेउ देखिन्थे एक भलाद्मी उज्ज्वल विक्रम थापा। बिरामीप्रति उनको लगाव, निस्वार्थ सेवा, करुणाको कथा आफैंमा चाखलाग्दो छ।
आइतबार सुन्धाराको एक रुफटप रेष्टुरेन्टमा रिपब्लिका मिडियासँग उनको अन्तरर्वाता करीब पाँच घन्टा चल्यो। त्यसबीच उनलाई तीन फोनकल आए। एकाउन्न बर्षीय थापालाई आएका ती कलहरु घरपरिवार वा साथीभाइका थिएनन्। केहि असहायले आँफु वा परिवारको गम्भीर स्वास्थ्य समस्याको समधानका लागि उनीसँग सहयोगको आशा गरेका थिए।
