कैलालीको पूर्व पश्चिम राजमार्गमा बिहीबार बिहान मोटरसाइकल दुर्घटना हुँदा एक जनाको मृत्यु भएको छ ।
पूर्व पश्चिम राजमार्ग अन्तर्गत घोडाघाडी नगरपालिका–२ साडेपानीमा मोटरसाइकल एकआपसमा ठोक्किएर दुर्घटना हुँदा सोही वडाका मोटरसाइकलमा सवार ५० वर्षीय देवीराम आचार्यको मृत्यु भएको हो ।
जिल्ला प्रहरी कार्यालय कैलालीका प्रबक्ता एवं प्रहरी नायव उपरीक्षक (डिएसपी) दक्षकुमार बस्नेतका अनुसार पश्चिमबाट पूर्वतर्फ जाँदै गरेको अनटेस्ट मोटरसाइकल र पूर्वबाट पश्चिमतर्फ आउँदै गरेको से ७ प ८७५० नम्बरको मोटरसाइकल एक आपसमा ठोक्किँदा आचार्यको मृत्यु भएको हो ।
अनटेस्ट मोटरसाइकल चालक घोडाघाडी नगरपालिका–८ का २३ वर्षीय लोकेन्द्र गुरुङलाई मोटरसाइकलसहित प्रहरीले नियन्त्रणमा लिएको छ । अर्का मोटरसाइकल चालक घोडाघोडी–२ का ४६ वर्षीय ईन्द्र आचार्यको घोडाघोडी अस्पताल सुखडमा उपचार भइरहेको डिएसपी बस्नेतले जानकारी दिए ।
