फिफा विश्वकप २०२६ को फाइनलमा स्पेनसँग पराजित भएपछि अर्जेन्टिनाका डिफेन्डर लिसान्द्रो मार्टिनेजले समर्थकका नाममा भावुक सन्देश दिएका छन्। उनले उपाधि जित्न नसके पनि अर्जेन्टिनाको यात्राप्रति आफूलाई गर्व रहेको बताएका छन्।

विश्वकप उपाधि रक्षा गर्ने अभियानमा रहेको अर्जेन्टिना फाइनलमा स्पेनसँग अतिरिक्त समयमा १–० ले पराजित भएको थियो। त्यसपछि म्यानचेस्टर युनाइटेडका खेलाडी मार्टिनेजले सामाजिक सञ्जाल ‘एक्स’मार्फत समर्थकप्रति आभार व्यक्त गरेका हुन्।

‘हामी सबैले योग्य ठानेको ट्रफी घर ल्याउन नसकेको पीडासहित पनि यो जर्सी, मेरा सहकर्मी खेलाडी, प्रशिक्षक टोली र सम्पूर्ण टिमप्रति गर्व छ,’ उनले लेखेका छन्। उनले टोलीको सफलताका पछाडि खेलाडी मात्र नभई व्यवस्थापक, मेडिकल टोली, खाना बनाउने कर्मचारी, किट व्यवस्थापन गर्ने व्यक्तिसहित सबैको योगदान रहेको उल्लेख गरेका छन्।

मार्टिनेजले अर्जेन्टिनाका समर्थकले देखाएको माया, समर्थन र एकताप्रति धन्यवाद दिँदै फाइनलको नतिजाले सम्पूर्ण यात्रालाई मूल्यांकन गर्न नहुने बताएका छन्।

‘हामीले धेरै कठिनाइ सामना गर्‍यौं, असम्भव जस्तो देखिएका कुरालाई सम्भव बनायौं र कहिल्यै बहाना खोजेनौं, अघि बढ्ने कारण खोज्यौं,’ उनले भने।

उनले विश्वकप विजेता स्पेनलाई बधाई दिँदै टोलीले योग्य रूपमा उपाधि जितेको बताए। मार्टिनेजले अर्जेन्टिनाको राष्ट्रिय टोलीबाट खेल्न पाउनु आफ्नो जीवनकै ठूलो गर्व भएको उल्लेख गर्दै समर्थकलाई देशको माया र एकता कायम राख्न आग्रह गरेका छन्।

‘हाम्रो देशको ख्याल राखौं। म अर्जेन्टिनालाई धेरै माया गर्छु,’ उनले सन्देशको अन्त्यमा लेखेका छन्।