राष्ट्रिय स्वतन्त्र पार्टी (रास्वपा)का सांसद जगदीश खरेलले प्रधानमन्त्री दैवी प्रकोप कोषको नाम परिवर्तन गर्न माग गरेका छन्।

मंगलबार प्रतिनिधिसभा बैठकको आकस्मिक समयमा बोल्दै उनले प्रधानमन्त्री दैवी प्रकोप कोषको नाम परिवर्तन गरेर प्रधानमन्त्री विपद् राहत कोष भनेर कायम गर्न माग गरेका हुन्।

अहिले रसुवामा आएको भोटेकोशी बाढी पनि दैवी प्रकोप नभएको उनले प्रष्ट पारे।

उनले भने–
हामी भोटेकोशी बाढीको पीडामा छौं। र यो विपद्को सामना गरिरहेका छौं। यो भोटेकोशी बाढी दैवी प्रकोप होइन भन्ने कुरामा हामी स्पष्ट छौं। यो बाढीमात्रै होइन, कुनै पनि बाढी, पहिरो डुबान, कटान, भुइँचालो, आगलागी कुनै पनि दैवी प्रकोप होइनन्। कि यी मानव सिर्जित हुन्, कि यी प्राकृतिक विपद् हुन्।

२०३९ सालमा बनेको दैवी प्रकोप ऐनलाई विस्थापित गरेर आएपछि अब दैवी रहेन। मेरो आग्रह छ, यो प्रधानमन्त्री दैवी प्रकोप उद्धार कोषको नाम परिवर्तन गरेर प्रधानमन्त्री विपद् राहत कोष भनेर कायम गरियोस्। अब दैवी प्रकोपको जमाना रहेन।