कपिलवस्तुकाे गौतमबुद्ध साझेदारी वनको रुख कटानमा भ्रष्टाचार गरेकाे आरोपमा राष्ट्रिय प्रजातन्त्र पार्टीका (राप्रपा)का प्रदेश सांसदसहित १९ जनाविरुद्ध मुद्दा दायर भएको छ।

अख्तियार दुरुपयोग अनुसन्धान आयोगले लुम्बिनी प्रदेशसभा सदस्य जानकी प्रसाद यादव, कपिलवस्तुका तत्कालीन जिल्ला वन अधिकृत कृष्णदत्त भट्ट, दुर्गा बहादुर कार्की, महेन्द्रराज वाग्लेसहित १९जनाविरुद्ध मंगलबार विशेष अदालतमा भ्रष्टाचार मुद्दा दायर गरेको हो।

उनीहरूमाथि आर्थिक वर्ष २०७४/०७५ मा गौतमबुद्ध साझेदारी वनमा ६ वटा कटान प्लटहरूको ३७ हजार क्यूफिट काठ काटी निकाल्ने ठेक्का स्वीकृत गराई कर्मचारीहरुसँग मिलेमतो गरी केही काठ लुकाई छिपाई नजिकैको स-मिलमा बिक्री गरी अनियमितता गरेको आरोपमा छ।

सांसद यादवविरुद्ध भ्रष्टाचार निवारण ऐन, २०५९ को दफा १७ बमोजिमको कसुरमा सोही ऐनको दफा १७ ले निर्देश गरेबमोजिम ऐ. ऐनको दफा ३ को उपदफा (१) को देहाय (छ) बमोजिमको कैदको सजाय गरी सोही ऐनको दफा ३ को उपदफा (१) अनुसार विगो बमोजिम जरिवाना गरी पाउन र सोही ऐनको दफा १७ बमोजिम विगो असुल उपर गरी पाउन मागदाबी लिइएको अख्तियार उल्लेख गरेकाे छ।