केपी (शर्मा ओली) फेरि आइपुग्नुभयो । उहाँले ‘असल र इमानदार साथीहरूबीच हाम्रा कुरा राख्दै गर्दा पनि हुन्छ’ भन्नुभयो । मैले कसैसँग कुरा राख्न सकेको थिइनँ र कोसिस गरुँला मात्र भनेँ ।
भोलिपल्ट हामी दुवै मेनरोड हुँदै निस्क्यौँ । मेनरोडको माझ बजार निकै चहलपहल हुने ठाउँ । त्यहीँ ‘रिजाल फोटो स्टुडियो’ थियो । कताबाट फोटो खिच्ने रहर उब्जियो । रहरको अगाडि केको डर ! पस्यौँ स्टुडियोभित्र । स्टुडियो चलाउने रिजाल दाइले झुस्स दारी मुसार्दै ‘कस्तो खिच्ने ?’ भने । हामीले रहरअनुसार सिङ्गल र डबल अनि हाफ साइज र फुल साइजका फोटा खिचिमाग्यौँ र बाटो लाग्यौँ ।
