नयाँ जीवित देव गणेश र भैरवको छनोट प्रक्रिया शुरु भएको छ। हाल जीवित देव गणेशका रुपमा समवेग शाक्य र भैरवका रुपमा रुजन शाक्य छन्। दुबैजना १४ वर्ष पुगिसके। जीवित देवहरु किशोर अवस्थामा प्रवेश गर्ने संघारमा रहेकाले गुठी संस्थानमा बुधवार नयाँ गणेश र भैरव छनोट गर्न बनेको कार्यदलको बैठक बसेको थियो।

उमेर नघिसकेकाले गणेश र भैरव परिवर्तन गर्न गुठी संस्‍थानको बैठकले शाक्य महाविहार संघलाई नयाँ गणेश र भैरव छनोट गरेर असोज १४ गतेभित्र सिफारिस गर्न अधिकार दियो। यससँगै ‍औपचारिक रुपमा यसै वर्षको दशैंमा नयाँ गणेश र भैरव छनोट गर्ने गरी कार्य शुरु भयो। प्रक्रिया खुलेसँगै ३ देखि ५ वर्षका बालकलाई गणेश र भैरव बनाउन इच्छुक शाक्य महाविहार संघका शाक्य खलक परिवारले निवेदन दिन सक्नेछन्। सिफारिसमा परेका बालकहरुलाई छनोट गरिए अर्को वर्षको येँया: (इन्द्रजात्रा) मा नयाँ गणेश र भैरवले रथ यात्रा गर्नेछन्।