समाजवादी पार्टी नेपालका अध्यक्ष डा. बाबुराम भट्टराईसँग समसामयिक विषयवस्तुहरुमा रातोपाटीका लागि चन्द्र खाकी र बबिता शर्माले गरेको कुराकानी ।

अहिले प्रतिगमनको चर्को कुरा उठ्न थालेको छ । प्रधानमन्त्रीले ०१७ साल दोहोरिने कुरा गर्नुहुन्छ । पक्ष प्रतिपक्ष सबै नेपालमा प्रतिगमनको खतराको संकेत गर्दैछन् । तपाईको विचारमा प्रतिगमनको खतरा कत्तिको छ?खासगरी,क्रान्तिपछि प्रतिगमन वा प्रतिक्रान्तिहरु कसरी हुन्छ र त्यसको आधारभूमि नेपालमा बनेको छ कि छैन?

क्रान्ति निरन्तरको प्रक्रिया हो । यो विभिन्न चरण खुड्किला पार हुँदै अगाडि बढ्छ । सोही सिलसिलामा नै नेपालमा लामो समयदेखिको रहेको सामान्तवाद निरङ्कुशताको अन्त्य गरेर हामीले संघीय लोकतान्त्रिक गणतन्त्र ल्याएका हौं ।

हामीले ल्याएको परिवर्तनको सिलसिलामा राजनीतिको उपरी संरचनामा परिवर्तन त आयो तर खासगरी राज्यको पुर्नसंरचना, एकात्मक राज्यलाई संघात्मकतामा पुर्नसंरचना गर्ने र कार्यान्वय गर्ने केही पक्षहरु अझै बाँकी छन् ।