काठमाडौं: तीन वर्षअघि पूरानो बसपार्कमा भ्यूटावर बनाउने जिम्मा जलेश्वर स्वच्छन्द विकोईले पायो।
तीन वर्षअघि उपराष्ट्रपत्ति नन्दबहादुर पुनले शिलान्यास गरेको यो भ्यूटावरको एक प्रतिशत पनि काम सकेको छैन। यस कम्पनीका संचालक मनोज भेटवाल हुन्। उनी एपेक्स डेभपलमेन्ट बैंकको घोटाला काण्डमासमेत मुछिएका थिए। भेटवालले बैकका कर्मचारीको मिलोमतोमा कमसल जग्गा धितो राखेर ११ करोड ९० लाखभन्दा बढी ऋण लिएको आरोपमा पक्राउ परेका थिए।
तर त्यही कम्पनीले खुलामञ्चमा बनाएको अस्थायी बसपार्कमा धमाधम सटर बनाएर बिक्री गरिरहेको छ। काठमाडौं महानगरपालिकालाई कुनै जानकारी नदिई अस्थायी बसपार्कमा अस्थायी सटर बनाएर कम्पनीले बेचिरहेको छ। सार्वजनिक जग्गामा रजगज गरिरहेको यो कम्पनीले सटर पनि सलामी लिएर बिक्री गरिरहेको छ। कम्पनीले सटर बनाएको बारे महानगरपालिका बेखबर छ।
