नौ महिना पुग्न लाग्दा पनि दोषी पत्ता लाग्न नसकेको निर्मला प्रकरणको केन्द्रमा एक त्यस्तो शक्तिशाली व्यक्ति छन्, जसले यो बीचमा जे भन्यो राज्यले त्यही गर्न बाध्य भएको छ। आन्दोलनकारी मात्र हैन, राजधानीका मिडियालाई समेत आफ्नो एजेन्डामा हिँडाउन सफल भएका छन्। सुदूरपश्चिमको एउटा खोल्सा छेउमा भएको अपराधको घटनालाई राष्ट्रिय अन्तर्राष्ट्रिय चासोको विषय बनाउनमा मात्र हैन, त्यसलाई ट्विस्ट एन्ड टर्न गर्न पनि उनको भूमिका देखिन्छ।
र, उनी आफूलाई निर्मला पन्तको हत्या कसले गर्यो पनि थाहा भएको दावी गर्छन्। घटनाको एक महिना नपुग्दै उनले आफै फेसबुकमा घोषणा गरेका थिए- 'म त्यो भिआइपी बलात्कारी र हत्याराको भण्डाफोर गर्दैछु। को को हुनुहुन्छ साथमा?'
