पार्टीभित्रका असन्तुष्ट नेता फकाउन सत्तारुढ नेकपाका अध्यक्षद्वय केपी शर्मा ओली र पुष्पकमल दाहाल प्रचण्डले पहल थालेका छन् । अध्यक्षद्वय ओली र प्रचण्डले आइतबार बिहान मात्रै सचिवालय सदस्य वामदेव गौतमलाई बालुवाटार बोलाएर सुझाव मागेका थिए ।
झन्डै डेढ घण्टासम्म चलेको छलफलमा नेता गौतमले साङ्गठनिक एकीकरणकोे गृहकार्यमा माधव नेपाललाई पनि सँगै राख्न अध्यक्षद्वलाई सुझाव दिएको उनले रातोपाटीलाई बताए । त्यसबाहेक नेता गौतमले स्पष्ट मापदण्ड बनाएर एकीकरण टुङ्ग्याउनुपर्ने सुझाव दिएको बताए ।
