बहुक्षेत्रीय प्राविधिक तथा आर्थिक सहयोगका लागि बङ्गाल खाडीको प्रयास (बिम्स्टेक) को छैटौँ शिखर सम्मेलन सुरु भएको छ।
बैङ्ककस्थित होटल साड्ग्रिलामा सदस्य मुलुकका सरकार प्रमुखहरुको सामुहिक फोटोसेसन र कार्यसूची टेबल गरिएसँगै बिम्स्टेक सम्मेलन सुरु भएको हो।
सदस्य मुलुकका प्रतिनिधिमण्डलका नेताहरुलाई आयोजक राष्ट्र थाइल्याण्डका प्रधानमन्त्री पे थोङ् थान् शिनावातले स्वागत गरेका थिए।
सम्मेलनमा आज प्रधानमन्त्री केपी शर्मा ओलीसहित सदस्य मुलुकका सरकार प्रमुखहरुले सम्बोधन गर्ने कार्यक्रम रहेको छ।
शिखर सम्मेलनमा ‘बिम्स्टेक म्यारिटाइम ट्रान्सपोर्ट कोअपरेसन’मा हस्ताक्षरपछि सदस्य मुलुकहरु थाइल्याण्ड, बङ्गलादेश, भूटान, भारत, म्यान्मार, नेपाल र श्रीलङ्काका प्रधानमन्त्री (प्रतिनिधिमण्डलका नेता)हरुले सम्बोधन गर्नेछन्।
यो औपचारिक सम्मेलनपछि राष्ट्रप्रमुखहरूको साइडलाइन भेटवार्ता हुनेछ। नेपालका प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीबीचको भेटवार्ता पनि तय भएको नेपाली प्रतिनिधि टोलीले जनाएको छ।
सम्मेलन सुरु हुनुभन्दा २ दिन अघि नै थाइल्याण्ड गएका ओलीले त्यहाँ कैयौ द्वीपक्षीय भेटवार्ता पनि गरिरहेका छन्। औपचारिक कुटनीतिक सम्बन्ध कायम भएपछि नेपालका प्रधानमन्त्रीको यो पहिलो भ्रमणका क्रममा थाइल्याण्डसँग कैयौ सम्झौताहरू भएका छन्।
