ट्रम्प प्रशासनले अमेरिकी अन्तर्राष्ट्रिय विकास नियोग (यूएसएआईडी) बन्द गर्ने घोषणा गरेको छ। राष्ट्रपति डोनाल्ड ट्रम्पको निर्णयसँगै प्रशासनले यूएसएआईडीलाई परराष्ट्र मन्त्रालयमा गाभ्ने घोषणा गरेको हो।

अमेरिकी खर्बपति तथा सरकारी दक्षता विभाग ‘डज’का निर्देशक एलन मस्कले आफ्नो सुझाव र राष्ट्रपति ट्रम्पको निर्णयले ‘यूएसएआईडी’ बन्द गर्न लागेको घोषणा गरेका हुन्।

समाचार संस्था रोयटर्सका अनुसार यूएसएआईडीका कर्मचारीहरूलाई सूचना जारी गर्दै वासिङ्टनस्थित मुख्यालय प्रवेश नगर्न निर्देशन दिइएको छ। र, उनीहरूलाई घरमै बस्न निर्देशन दिइएको छ। 

त्यति मात्र होइन, यूएसएआईडीको वेबसाइट पनि बन्द गरिएको छ। र, भारी मात्रामा कर्मचारी कटौती गर्ने बताइएको छ।

विदेशमन्त्री मार्को रुबियोले यूएसएआईडी विदेश मन्त्रालयअन्तर्गत ल्याइएको र आफू कार्यवाहक प्रशासक भएको घोषणा गरेका छन्।

केही दिनअघि मस्कले यूएसएआईडीविरुद्ध भ्रष्टाचार र आर्थिक अनियमितताको आरोपसहित कट्टरपन्थी समूह हाबी भएको दाबी गरेका थिए।
 
अमेरिकी राष्ट्रपतिमा ट्रम्पले कार्यभार सम्हालेलगत्तै ९० दिनका लागि सबै प्रकारका अमेरिकी सहयोग निलम्बन गरिएको छ। ९० दिनको मूल्यांकनपछि मात्र सहयोगहरू अघि बढाउने वा बन्द गर्ने निर्णय लिइने ह्वाइट हाउसले जनाएको छ।