राष्ट्रिय स्वतन्त्र पार्टी (रास्वपाले) सचिवालयकाे आकस्मिक बैठक बाेलाएकाे छ।
पार्टी सभापति रवि लामिछानेविरुद्ध जिल्ला अदालत कास्कीमा मुद्दा दर्ता भएपछि रास्वपाले सोमबार अपरान्ह ४ बजे बस्ने गरी आकस्मिक बैठक बोलाएको हाे। बैठक भर्चुअल माध्यमबाट बस्नेछ।
बैठकमा सभापति लामिछानेमाथि लागेको मुद्दा र पार्टीको आगामी रणनीतिको विषयमा छलफल हुनेछ भने पार्टी सभापतिको कार्यबाहक जिम्मेवारी तोक्नेबारे छलफल हुने बताइएकाे छ।
सभापति लामिछानेविरुद्ध जिल्ला सरकारी वकिल कार्यालय कास्कीले आइतबार सङ्गठित अपराध, सहकारी ठगी र सम्पत्ति शुद्धीकरणसम्बन्धी कसुरमा अभियोग पत्र दर्ता गरेकाे थियाे।
उनलाई बयानका लागि आजै अदालतमा उपस्थित गराइसकिएको छ।
गोर्खा मिडियाका तत्कालीन प्रबन्ध निर्देशकसमेत रहेका लामिछानेलाई सहकारीको रकम अपचलन र संगठित अपराधमा गत कात्तिक २ गते पक्राउ गरिएकाे थियाे।
