बलिउड इन्डस्ट्रीमा एउटा हृदयविदारक घटना घटेकाे छ। मलाइका अरोराका पिता अनिल अरोराले मुम्बईको बान्द्रास्थित आफ्नो घरमा आत्महत्या गरेका छन्।
अनिल भवनको छैठौं तलामा बस्ने गरेका थिए, जहाँबाट हाम फालेर उनले आत्महत्या गरेका हुन्।
उनलाई के समस्या थियो वा आत्महत्या गर्नुको वास्तविक कारणबारे अहिलेसम्म कुनै जानकारी आएको छैन। उनको शव पोष्टमार्टमका लागि पठाइएको छ।
अनिलकाे निधन भएसँगै बलिउडका धेरै सेलिब्रेटीहरू अभिनेत्रीको घर पुग्न थालेका छन्। अभिनेत्रीको घरमा सबैभन्दा पहिले अरबाज खान पुगेका थिए।
केही समयपछि मलाइका उनकी बहिनी अमृता, सलमानकी बहिनी अलविरालगायत गएका थिए।
को थिए अनिल अरोरा?
मलाइका अरोरा ११ वर्षकी हुँदा उनका बुबा र आमा छुट्टिए। त्यतिबेला अमृता ६ वर्षकी मात्र थिइन्। मलाइकाका बुबा पञ्जाबी हिन्दू परिवारका थिए।
उनको परिवार सीमावर्ती फाजिल्का जिल्लाका बासिन्दा हुन्। अनिल अरोरा एक सेवानिवृत्त मर्चेन्ट नेवी अफिसर थिए।
मलाइकाकी आमा मलायाली क्रिश्चियन हुन्। उनको नाम जोइस पोलीकार्प हो। एक अन्तर्वार्तामा मलाइकाले आमाबुवाको विछोडले आफूमा गहिरो प्रभाव परेको बताएकी थिइन्।
आमाबाबुको बिछोडको बावजुद मलाइका र अमृताले दुबै जनासँग राम्राे सम्बन्ध राखेका थिए। मलाइकाले आफ्नो परिवारसँग सेयर गरेको अन्तिम तस्विरमा सबैजना निकै खुसी देखिन्छन्।
