सडक कुकुरको उद्धार र हेरचाहमा रमाइरहेकी सुनिता प्रधान लिम्बू भन्छिन्, “यी अबोध प्राणीलाई त मैले दिन सक्ने माया दिएकी हुँ, यिनीहरूलाई स्याहार्दा कता हो कताको अपार खुशी पाएकी छु।”

साँझको करीब ७ बजेको छ। काठमाडौंको गोंगबु चोकमा एक महिला दुवै हातमा बाल्टिन बोकेर सडकमा देखा पर्छिन्। उनलाई देख्नासाथ २५/३० वटा कुकुर वरिपरि झुम्मिन्छन्।

सधैंको दैनिकी भएकाले कुकुरहरूलाई थाहा छ, बाल्टिनमा उनीहरूका लागि खानेकुरा आयो। महिलाले तिनलाई मासुभात भाग लगाएर खुवाउँछिन्। सबैले सासैले टिप्छन् खाना। खूब स्वादले खाएको हेरेर महिला प्रसन्नचित्तमा घर फर्कन्छिन्।