उपप्रधान तथा गृहमन्त्री रवि लामिछाने र श्रम, राेजगार तथा सामाजिक सुरक्षामन्त्री डाेलप्रसाद (डिपी) अर्यालकाे मन्त्रालय हेरफेर गर्नुपर्ने भन्दै प्रधानमन्त्री तथा मन्त्रिपरिषद् कार्यालयमा निवेदन परेको छ।
स्वार्थको मन्त्रालय जोडिएको भन्दै युवराज सफलले आइतबार प्रधानमन्त्री कार्यालय सिंहदरबारमा पुगेर निवेदन दिएका हुन्।
उनले निवेदनमा रवि लामिछानेमाथि राहदानी दुरुपयोगसम्बन्धी मुद्धा सर्वोच्च अदालतमा विचाराधीन रहेको, उनी गृहमन्त्रीमा रहँदा आफ्नो राहदानीसम्बन्धी मुद्धाको अनुसन्धान प्रभावित पार्ने एवम् प्रमाण नष्ट गर्ने सम्भावना देखिएकोले गृहमन्त्री बन्न नहुने उल्लेख गरेका छन्।
यसैगरी रविमाथि सहकारी ठगीसम्बन्धी कसुरमा अनुसन्धान भइरहेकोले उनी गृहमन्त्री हुँदा अनुसन्धान प्रभावित र प्रमाण नष्ट गर्न सभावना देखिएको बताएका छन्।
त्यस्तै, रवि लामिछानेमाथि सम्पत्ति शुद्धिकरण विभागले समेत अकुत सम्पत्ति कमाएको आरोपमा आवश्यक अनुसन्धान एवम् छानविनसमेत गरिरहेकोले उनी तत्काल पदमा रहिरहन नमिल्ने सफलको दाबी छ।
यता, श्रममन्त्री डिपी अर्यालमाथि मेनपावर व्यवसायीको रुपमा कार्य गरेको र हाल पनि मेनपावर कम्पनीको जिम्मेवार पदमा रहेको हुनाले श्रममन्त्रीको जिम्मेवारीमा रहिरहन नमिल्ने सफलको दाबी छ।
साथै सफलले उल्लेखित मन्त्रीहरुको जिम्मेवारी हेरफेर नगरेको खण्डमा यसै विषयलाई बोकेर अदालतमा प्रधानमन्त्रीसमेतलाई विपक्षी बनाई कानुनी उपचारमा जान सक्ने चेतावनीसमेत दिएका छन्।
.jpg)
