शैक्षिक तथ्यांकहरूले देशमा सामुदायिक विद्यालयको शैक्षिक गुणस्तर न्यून रहेको देखाउँछ।
कक्षा १० को अन्तिममा लिइने एसइई र कक्षा आठको अन्तिममा लिइने डिएलई जस्ता परीक्षाहरूले पनि निजी विद्यालयको तुलनामा सामुदायिक विद्यालयमा शैक्षिक गुणस्तर न्यून रहेको देखाउँछन्।
मैले शिक्षणलाई पेसा बनाएको करिब आठ वर्ष भएको छ। यो अवधिसम्म आइपुग्दा मैले पाँच वटा निजी विद्यालयमा शिक्षण गरेको छु।
पछिल्लो समय करिब एक वर्षदेखि सामुदायिक विद्यालयमा शिक्षण गर्दैछु। सुरूआतमा मैले धनगढीका दुई वटा निजी विद्यालयमा पढाएँ। त्यसपछि एक वर्ष नुवाकोट, एक वर्ष जुम्ला र एक वर्ष रूकुम पूर्वको निजी विद्यालयमा। यो अवधिसम्म आइपुग्दा सामुदायिक विद्यालय र निजी विद्यालयको शैक्षिक गुणस्तरबीच निकै ठूलो खाडल रहेको मैले अनुभव गरेको छु।
