सरकारले सरकारी कार्यालयले सामाजिक सञ्जाल प्रयोग गर्नेसम्बन्धी निर्देशिका स्वीकृत गर्ने निर्णय गरेकाे छ।
बिहीबार बसेको मन्त्रिपरिषदको बैठक सामाजिक समितिबाट पेश भएको उक्त निर्देशिका स्वीकृत गर्ने निर्णय गरेकाे सरकारका प्रवक्ता एवम् सञ्चार तथा सूचना प्रविधिमन्त्री रेखा शर्माले जानकारी दिइन्।
यसैगरी बैठक राष्ट्रियसभा सदस्य निर्वाचन ऐन, २०७५ को दफा २ को खण्ड (ख)को प्रयोजनका लागि राष्ट्रिय जनगणना, २०७८ को कूल जनसंख्याको ०.५ (शून्य दशमलब पाँच) प्रतिशतभन्दा कम जनसंख्या रहेका अल्पसंख्यक जातजाति (दलितबाहेक)लाई अल्पसंख्यकको रुपमा तोक्ने निर्णय गरेकाे छ।
मन्त्री शर्माका अनुसार सामाजिक समितिबाट पेश भएको अपाङ्गता भएका व्यक्तिसम्बन्धी राष्ट्रिय नीति, २०७९ स्वीकृत गर्ने निर्णय भएकाे छ।
यस्तै राष्ट्रिय बालबालिका नीति, २०७९ स्वीकृत गर्ने निर्णय गरेकाे पनि मन्त्री शर्मा बताइन्।
