०७९ को निर्वाचनबाट चौथो ठूलो दलका रूपमा उदाएको रास्वपा प्रतिनिधिसभामा ३२ सिट रहेको मधेशमा सांगठनिक पकड बढाउने तयारीमा, पहिलो चुनावमै मधेशमा मन जितेको जनमत पहाडमा पनि संगठन विस्तार गर्ने प्रयासमा

संगठन विस्तारको अभियान लिएर राष्ट्रिय स्वतन्त्र पार्टी मधेश झरेको छ । प्रतिनिधिसभामा ३२ सिट रहेको मधेशका आठ जिल्लाबाट प्राप्त हुने शक्ति राष्ट्रिय दलका लागि महत्वपूर्ण हुन्छ । यो रणनीतिक महत्वलाई ध्यान दिँदै रास्वपा सभापति रवि लामिछानेसहितका नेताहरू पार्टीको कमजोर प्रभाव रहेको क्षेत्र मधेश पसेका हुन् ।

०७९ को निर्वाचनबाट देशमा नयाँ राजनीतिक शक्तिका रूपमा उदाए पनि रास्वपाले मधेशमा एक सिट पनि जित्न सकेको थिएन । उपनिर्वाचनमा चितवन र तनहुँमा जित निकाले पनि मधेशको बारामा रास्वपा उम्मेदवार पराजित भएका थिए । बारा– २ का रास्वपा उम्मेदवार पूर्वडिआइजी रमेश खरेलको जमानत जफत भएको थियो ।