टेक्सासको नेपाली समुदायका अगुवा कृष्ण लामिछानेको संदिग्ध मृत्यु छानबिनकै क्रममा रहेको बेला शनिबार अन्त्येष्टी गरिएको छ । परिवारको सहमति भन्दै स्थानीय नेपाली समुदायको अगुवाइमा गरिएको यो अन्त्येष्टीलाई लिएर परस्पर विरोधी मतहरू सार्वजनिक भएका छन् ।
अन्त्येष्टीको पक्षमा रहेकाहरूले जे हुन भै गयो , अब यो घटनालाई तन्काएर कहीँ पनि नपुगिने भएकाले अन्त्येष्टी सही भएको दाबी गरेको छ । उनीहरूको तर्क छ, अनुसन्धान गरिरहेको अर्भिङ प्रहरीले 'अनुसन्धान प्रारम्भिक चरणमा रहेको र यस बिन्दुमा त्यहाँ कुनै अपराधिक घटना भएको संकेत नभेटिएको जनाएको' छ, अनुसन्धानको निस्कर्ष आएपछि जे हुनुपर्ने त्यही हुँदै जानेछ ।'
तर, अन्त्येष्टीको विपक्षमा रहेकाले ' स्वर्गीय कृष्ण लामिछानेको मृत्यु संदिग्ध रहेको र उनको बृद्ध बाबुले छोराको मुख हेर्न आउनका लागि नेपालमा प्रक्रिया चलाइरहेकै बेला अन्त्येष्टी गरिनु न्यायोचित नभएको बताएका छन् । उनीहरू भन्छन्, अनुसन्धान जारी रहेकै बेला संकास्पद रहेको परिवारका सदस्यकै सहमतिमा अन्त्येष्टी गरिनुले घटनालाई थप रहस्यमय बनाएको छ । अझ यसमा टेक्सासका नेपाली समुदायका विभिन्न संघ-संस्था र अगुवाहरू नै लाग्नुले घटनालाई थप शंकाको घेरामा लगेको छ ।'
यही क्रममा के पनि प्रश्न उठाइएको छ भने, 'कतै यो घटनामा परिवारसहित समुदायका अगुवाहरूकै संलग्नता त छैन ? ' उनीहरू के पनि भनिरहेका छन् भने , ' समुदायको एक अगुवा यसरी घरमा चरम यातनाबाट मरिरहेको छ, यसबारे जानकार समुदाय र अगुवाहरू रमिता हेरिरहेका छन्, यस्तो रमिते समुदाय किन चाहिन्छ ?'
यसैबीच नेपालमा रहेको स्वर्गीय कृष्ण लामिछानेको परिवारले मृत्युमा लामिछानेकी श्रीमति र परिवारका अन्य सदस्य जिम्मेवार रहेको बताएका छन् । ब्रेक एन लिंक्ससँग सम्पर्कमा आएका भाइ कपिल लामिछाने भने, 'दाइको मृत्यु पारिवारिक चरम यातनाले भएको प्रष्ट छ । हामी बुबालाई पठाउने व्यवस्था गरिरहेकै बेला दाइको अन्त्येष्टी गरिनु र त्यसमा अझ समुदायका अगुवाहरू नै संलग्न हुनुले हामीलाई अरू दु:खी बनाएको छ ।'
'वृद्ध बुबा भनिरहनु भएको छ, एकपटक छोराको अनुहार हेर्छु। हामी त्यसको लागि व्यवस्था गरिरहेका छौ । तर, उता टेक्सासको नेपाली समुदाय भने वृद्ध बुबाको त्यो अन्तिम इच्छा पनि सुनिरहेको छैन । कस्तो समवेदनाहीन समाज हो?, हामीले बु्झ्न सकेका छैनौ', कपिलले भने ।
टेक्सासको नेपाली समुदायका अगुवा लामिछाने मंगलबार घरमै मृत अवस्थामा भेटिएका थिए । अर्भिङ प्रहरीले केही समयका लागि घटनास्थल आफ्नो नियन्त्रणमा लिएर घटनाको विवरण लिएको थियो ।
प्रहरीले घटनास्थललाई मात्र आधार बनाएर 'त्यहाँ कुनै अपराधिक घटना भएको संकेत नभेटिएको' जनाए पनि अनुसन्धान जारी रहेको बताएको छ । तर, घटना अनुसन्धानकै क्रममा रहेको बेला परिवारको सहमति भन्दै स्थानीय नेपाली सुमदायको अगुवाइमा लामिछानेको दाहसंस्कार गरिएको छ । ह्यजुेस फेमिली ट्राइब्यूट सेन्टरमा दाहसंस्कार गरिनुअघि अन्तिम श्रद्धाञ्जली अर्पण गरिएको थियो ।
स्वर्गीय लामिछानेको दाहसंस्कार गरिए पनि उनको संदिग्ध मृत्युलाई लिएर उबब्जिएको आशंका र जन्मेका प्रश्नहरूको हल भएको छैन । अझ, छोराको मुख हेर्ने वृद्ध बुबाको अन्तिम इच्छाको पनि अपमान गर्दै समुदायकै सक्रियतामा जुन किसिमले हतारमा दाहसंस्कार गरियो, त्यसले यहाँको नेपाली समुदायका अगुवाहरूमाथि पनि प्रश्नहरू तेर्सिएका छन् ।
