विवाद, अलमल र अनिश्चयबीच निर्माण भइरहेको काठमाडौं-तराई द्रुतमार्ग मुलुकलाई भार थोपर्ने महँगो आयोजनामा दरिने निश्चित छ।
विवादकै बीच २०७४ वैशाख २१ को मन्त्रिपरिषद् बैठकले चार वर्षभित्र सक्ने गरी नेपाली सेनालाई निर्माण व्यवस्थापन सुम्पिएको बहुचर्चित काठमाडौं-तराई द्रुतमार्गको प्रगति साढे ६ वर्ष पुग्न लाग्दा एक चौथाइ पनि छैन। सेनाकै अनुमानमा लागत अहिल्यै दोब्बरले थपिएर रु.दुई खर्ब १४ अर्बभन्दा बढी पुग्दै छ। निर्माण कहिले सकिन्छ र अन्तिम लागत कति पुग्छ, निश्चित छैन। निश्चित चाहिं एउटै कुरा छ- बहुप्रतीक्षित ‘मेगा’ परियोजना समय र लागत दुवै हिसाबमा देशका लागि भार बन्ने दिशामा छ।
