इतुम्बहालका प्रज्ञारत्न शाक्यको ठमेलमा चाँदीको गरगहनाको पसल थियो। एक दिन उनको पसलमा एक रूसी पर्यटक आए।
तिनले भने, “मसँग राम्रो जेनिथको क्यामेरा छ। पैसा पनि मिलाउँछु। लिनुहुन्छ?”
प्रज्ञारत्न फोटो खिच्नमा शौखिन। क्यामेरा देखेपछि मन थाम्नै सकेनन्। फ्याट्ट भनिहाले, “लु, मिलाउनुस् दाम।”
दुवैले एक हजार रुपैयाँमा कुरा मिलाए। “२०५२ सालमा एक हजारले धेरै काम हुन्थ्यो,” प्रज्ञारत्न सम्झन्छन्, “तैपनि क्यामेरा चलाउने शौख पूरा गर्नु थियो। सस्तोमा पनि पाएँ र खरीद गरें।”
प्रज्ञारत्नको यही क्यामेराले २५ वर्षअघि चोरी भएको इतुम्बहालको केशचन्द्र महाविहारको सम्पदा अहिले नेपाल फिर्ता ल्याएको छ।
क्यामेरा किनेपछि प्रज्ञारत्नले केशचन्द्र महाविहारको भित्र-बाहिरका सम्पदाहरूको तस्वीर लिएका थिए। तस्वीर लिनुको उद्देश्य थियो- नयाँ क्यामेराबाट राम्रो खिच्ने अभ्यास गर्नु।
उनले लगभग २५ वटा तस्वीर खिचेका रहेछन्। जसको नेगेटिभ बनाएर सुरक्षित राखेका थिए।
