काठमाडौं । ‘अल एनिमल आर इक्वेल बट सम आर मोर इक्वेल देन अदर्स’ अर्थात्, ‘सबै जनावरहरू समान छन् तर केही अरुभन्दा बढी समान छन् ।’ ख्यातिप्राप्त बेलायती लेखक जर्ज अर्वेलको प्रसिद्ध उपन्यास ‘एनिमल फार्म’को एउटा प्रसिद्ध उद्धरण हो यो ।
समाजमा व्याप्त असमानताहरूको व्याख्या गर्दै लेखिएको उक्त भनाइलाई समानताको व्याख्या गर्दा पनि प्रयोग गर्ने गरिएको पाइन्छ ।
अर्वेल ब्रिटिशकालीन भारतको बिहार राज्यको मोतीहारी जिल्लामा जन्मिएका एक बेलायती लेखक हुन् ।
उनी बेलायती प्रहरीका अधिकृत भएर पनि भारत र बर्मामा काम गरेका थिए । मोतीहारी नेपालको सीमावर्ती जिल्ला हो ।
४६ वर्षको अल्पायुमै सन् १९५० मा मृत्यु भएका ओर्वेलले तत्कालीन बेलायती शासन व्यवस्थाले स्थानीय आम नागरिकविरुद्ध गरेको ज्यादतीलाई व्यङ्ग्यात्मक रूपमा चित्रण गरेको पाइन्छ । उनी समाजवादी विचारका अनुयायी थिए ।
