‘दशरथ चन्द र गंगालाल श्रेष्ठलाई राति १० बजेतिर लरीमा हालेर प्याफलको बाटोबाट शोभा भगवती लगिएको थियो । गंगालालको घर बाटैमा पर्थ्यो । लरीबाट गंगालालले आफ्नी श्रीमतीलाई हसिना ! हसिना ! भन्न भ्याए ।’ चन्द र श्रेष्ठलाई गोली हान्ने नरशमशेरले आफ्नो आत्मकथामा लेखेका छन् ।

माघ १९९७ मा सहादत प्राप्त गर्नेमध्ये सबैभन्दा कान्छा (२२ वर्षका) थिए श्रेष्ठ । उनीसँगै पक्राउ परेका गोविन्दप्रसाद उपाध्यायले गंगालालका लागि हसिना कति प्यारी थिइन् भनेर वर्णन गर्दै लेखेका छन्- हसिना उनको जीवनको अति प्यारो शब्द थियो । त्यो शब्दभित्र उनकी प्यारी हसिना थिइन् । हसिना उनको दिलको प्रेम र ममताकी मूर्ति थिइन् । १५ माघ (१९९७) मा गंगालाल मारिनुभन्दा दुई दिन अगाडि माघ १३ गते हसिना सुत्केरी भएकी थिइन् । आफू बुवा भएको खबर सुनेका गंगालालले छोराको नाम ‘शशि’ राख्नु भनेर जेलबाट सन्देश पठाएका थिए ।