विदेशी भूमिमा आएर नेपालको पुरातत्त्व, प्राग्–इतिहास र मानवशास्त्रको क्षेत्रमा गुड्रुन कर्भिनसले पुर्याएको योगदान सम्झिनु त जरुरी छ नै उचित मूल्याङ्कनको पनि आवश्यकता छ।
अंग्रेजको प्रवेशसँगै भारतीय उपमहाद्वीपमा सभ्यताका विविध पक्षमा केन्द्रित रहेर अध्ययन अनुसन्धान हुन थालेको पाइन्छ। सन् १८६१ मा ब्रिटिश भारतमा ‘आर्कियोलोजिकल सर्भे अफ इन्डिया (एएसआई)’ को स्थापनापछि त इतिहास र संस्कृतिको अध्ययनमा पुरातात्त्विक प्रमाणलाई बढी महत्ता दिइयो।
ब्रिटिश-भारतमा जस्तै नेपालमा पनि ऐतिहासिक अध्ययन र अनुसन्धानमा विदेशी विद्वान्ले नै शुरूआत गरेको इतिहास छ। विशेषतः नेपालको पुराविद्याको खोजमा यूरोपियन र भारतीय इतिहासकारले योगदान दिएको देखिन्छ (महेशराज पन्त, नेपाली इतिहासको परिवेश, केहि ऐतिहासिक र मसिजीवी, पृष्ठः ३५, ४३, ५३ ६१ र ८९)।
