पछिल्लो समय लोकप्रिय गन्तव्यको रुपमा विकसित हुँदै गइरहेको मर्दी हिमालमा समर स्की महोत्सव हुने भएको छ।
दिगो हिमालयन कोष नामक संस्थाको आयोजनामा मर्दी हिमालको आधार शिविरमा महोत्सव हुने भएको हो। आयोजक संस्थाका सदस्य प्रभात अधिकारीका अनुसार यही फेब्रुवरी १० देखि १८ (माघ २७ देखि फागुन ३) सम्म स्की महोत्सव गर्न लागिएको हो।
नेपालमा स्की पर्यटनको विकास गर्ने उद्देश्यले महोत्सव गर्न लागिएको अधिकारीले बताए। यो महोत्सवलाई ग्रेट हिमालयन स्की भ्रमण नाम दिइएको छ।
महोत्सव सम्पन्न गर्न १६ लाख रुपैयाँ खर्च लाग्ने अनुमान गरिएएको छ। उक्त खर्च अन्तरगत सबैभन्दा बढी बिमामा छुट्टाइएको छ। महोत्सवमा भाग लिनेहरुको बिमाका लागि २ लाख २० हजार रुपैयाँ विनियोजन गरिएको अधिकारीले जानकारी दिए।
संस्थाले मर्दीमा गर्न लागेको स्की महोत्सव आठौं चरणको हो। यस अघि मनास्लु, कालिञ्चोकलगायतका स्थानमा यो महोत्सव भइसकेको आयोजक सँस्थाका अध्यक्ष रामबहादुर थापाले बताए।
अन्तर्राष्ट्रिय स्की प्रशिक्षक कृष्ण थापा मगरको प्रशिक्षण तथा सहजीकरणमा यो महोत्सव हुन लागेको स्थानीय व्यवस्थापक सुदीप गौतमले जानकारी दिए।
यो महोत्सवले मर्दी हिमाल पदयात्रालाई झनै प्रचार प्रसार गर्ने गौतमले विश्वास व्यक्त गरे। गौतम मर्दी हिमाल पदयात्राका मार्गका प्रबर्द्धक हुन्।
महोत्सवमा संस्कृति, पर्यटन तथा नागरिक उड्डायन मन्त्रालय (संघ), गण्डकी प्रदेशको उद्योग, पर्यटन मन्त्रालय, नेपाल पर्वतारोहण संघ, टान, गण्डकी अल्पाईन क्लव लगायतका संस्था तथा मन्त्रालयले सहकार्य गरेका छन्।
महोत्सव अन्तरगत पदयात्रा, आधारभुत स्की तथा स्नोबोर्ड तालिम, जीवनरक्षा तालिम, स्थानीय समुदायसँग अन्तरक्रिया तथा स्की सम्बन्धि बृत्तचित्रहरु प्रदर्शन गरिने अधिकारीले जानकारी दिए।
संस्थाले ६ पटकसम्म लाङटाङ क्षेत्रमा स्की सम्बन्धि तालिम गराइसकेको छ। यसैगरी धौलागिरी हिमालमा डाउनहिल स्की अभियान, अन्नपूर्ण आधार शिविर, याला हिमाल मनास्लु, थोराङ भञ्ज्याङ, फ्रान्सको व्यालेन्स हिमाल, गोसाईंकुण्ड, मिरा हिमाल, मुक्तिनाथ क्षेत्र मनाङ लगायतका स्थानमा स्की पर्यटन प्रबर्द्धनका विभिन्न कार्यक्रमहरु सम्पन्न गरिसकेको छ।
महोत्सवमा सबै क्षेत्रका मानिसहरुले भाग लिन पाउने जनाइएको छ। तर आयोजकले भने, पथप्रदर्शक, हिमाल आरोहण गाईड तथा पर्यटन क्षेत्रमा काम गरिरहेकाहरुको सहभागितामा जोड दिएको छ। महोत्सवमा प्रत्यक्ष र अप्रत्यक्ष गरी ३ सय मानिहरु लाभान्वित हुने विश्वास गरिएको छ।
महोत्सवले नेपालको आन्तरिक पर्यटनको प्रबर्द्धन हुने, नेपालको पर्यटनमा नयाँ क्रियाकलाप थपिने, स्की सम्बन्धि सीप हस्तान्तरण हुने, नेपालको पर्यटन सबै मौसमका लागि भन्ने नारा स्थापित हुने स्थानीय व्यवस्थापक गौतमले विश्वास व्यक्त गरे।
नेपाल पर्वतारोहण संघ गण्डकी प्रदेशका अध्यक्ष शेषकान्त शर्माले मर्दी हिमालमा हुने स्की महोत्सवले कोरोनाकालमा थलिएको पर्यटनलाई चलायमान बनाउने विश्वास व्यक्त गरे। उनले यो महोत्सवमा सहकार्य गर्न पाउनु नेपालको पर्वतारोहण पर्यटनमा नयाँ आयाम थपिने दावी गरे।
