म्यान्मारमा बसोबास गर्ने नेपालीभाषी अर्थात् गोर्खाहरूले हर्षोल्लासका साथ विजयादशमी मनाएका छन्। यहाँका थ्रपै गाउँ–बस्तीमा नेपाली मूलका गोर्खाहरूको बाक्लो बसोबास छ।

पुरानो बर्मा अर्थात् म्यान्मारका नेपालीभाषीहरू नेपालजस्तै उमङ्ग र उर्जाका साथ नेपाली हिन्दू चाडपर्व मनाउँदैआएका छन्। रंगुन, माण्डले, मिचिना, मोगोक, टाउँजी, नाउँछो, नाम्टू, प्यिउल्वीन्, टमूलगायतका नेपाली बस्तीमा दशैंको छुट्टै रौनक हुने गर्दछ। तर याे वर्ष कोरोना महामारी र म्यान्मार सेनाको राजनैतिक ‘कू’ले देश संकटमा हुँदा दशैं पर्वमा थप उत्साहको देखिएन।

कोरोना र 'जुन्ता' त्रास एकैछिन बिर्सेर भएपनि बर्मेली–नेपाली समुदायले आफन्त र परिवारसँगै दशैं मनाएको छ। नेपाली तथा भारतीय मूलका प्रायःजसो सबैले यस्ता पर्वहरू आ–आफ्नो परम्परा र शैली अनुरूप मनाउँछन्।

म्यान्मारका गोर्खाहरूले दशैंमा बली चढाउँदैनन्। बली बिनाको दशैं मनाउँछन्। यहाँका नेपालीहरूले मान्यजनको हातबाट रातो र सेतो टीका ग्रहण गर्ने चलन छ।

प्रजातन्त्र र स्वतन्त्रताका लागि युद्ध मैदान उत्रिएका क्रान्तिकारी गोर्खाहरूले समेत आ–आफ्नो कार्यक्षेत्रमा दशैं मनाएका छन्। सेनाको क्रूरता र आतंकमा बाँचिरहेको म्यान्मारबाट सम्पूर्ण नेपालीजनमा मन–मन दशैं तथा तिहारको शुभकामना।

तस्विरमा हेर्नुस् केही बर्मेली–नेपालीहरूको दशैंः [सबै तस्विर– सामाजिक सञ्जाल]