बारा : निजगढ नगरपालिकाले राजस्व संकलनका नाममा वन र चुरे क्षेत्रका खोला दोहन गर्न आफूखुसी ठेक्का लगाएको छ।
कानूनी प्रकृया मिचेर नगरपालिकाले वन र चुरेको फेदीमा रहेका साना/ठूला गरी आधा दर्जन खोला दोहन गर्न उत्खनन् ठेक्का लगाएको हो। नगरपालिकाले चालु आर्थिक वर्षभित्रै ठेकेदारहरूलाई चुरेको वन र खोलानाला दोहन गर्न खटाउँदैछ।
नगरपालिकाले विगतका वर्षहरूमा प्रारम्भिक वातावरणीय परीक्षण (आईईई) अस्वीकृत ठेक्का सूचना पनि चालु आर्थिक वर्षमै एकलौटी निर्णय गरेर निकालेको वन कार्यालयले जनाएको छ।
चुरे क्षेत्रमा ढुंगा, गिटी, बालुवा संकलन तथा ओसारपसार गर्नुपरेमा जिल्ला दैवीप्रकोप समितिको सिफारिस र राष्ट्रपति चुरे संरक्षण समितिसँग अनुमति लिनुपर्ने कानूनी व्यवस्था छ।
