काठमाडौं । नेकपा एमालेको केपी ओली समूहमै मूलतः दुई धार देखा परेका छन् । दुईमध्ये एउटा धार शक्तिशाली हुँदा अर्को धार कमजोर हुने सिलसिला शुरु भएको छ ।
ओली समूहभित्र नेकपा हुँदैदेखि एउटा धारको नेतृत्व ईश्वर पोखरेल, विष्णु रिमाल लगायतले गर्दै आएका थिए । यो धारमा पोखरेल र रिमालबाहेक ओली नजिकका अन्य नेताहरु पनि सहभागी हुँदै आएका छन्, जसमा पछिल्लो समय शंकर पोखरेल थपिएका छन् ।
उता, अर्को धारको नेतृत्व एमाले संसदीय दलका उपनेता समेत रहेका सुवासचन्द्र नेम्वाङ, प्रदीप ज्ञवाली, पृथ्वी सुब्बा गुरुङ लगायतका नेताहरुले गरेका छन् । यो धारमा विष्णु पौडेल पनि समाविष्ट छन् ।
ओली समूहमा ईश्वर पोखरेल नेतृत्वको धारलाई ‘हार्डलाइनर’ भनेर बुझिन्छ । जबकि यो धारका नेताहरु ओलीबाहेक अरु कसैलाई नेता मान्न तयार नहुने मात्रै होइन कि पार्टीका आन्तरिक विवादमा समेत यो वा त्यो बहानामा मिल्नै लागेका विषयमा समेत अड्को थापेर बिथोल्ने काम गर्छन् ।
