सक्दिनँ उभिन त्यसरी
जसरी आजसम्म लाखौं मानिसहरु
उभिएर बसे चुपचाप
अदालत वरपर समाजको
अहँ सक्दिन म दबाएर पीडा
हास्न कृत्रिम हाँसो अरुका लागि
न त औपचारिकतामा बाधिनँ सक्छु
विनम्रताको कतै
अहँ सक्दिन म उभिन त्यहीँ पंक्ति
जहाँ उहीँ ढर्रा, उहीँ स्वाङ रचिन्छ बारम्बार र
राख्नुपर्छ आफैलाई साँघुरो बन्धनमा
पुरानो सभ्यताको
अहँ सक्दिन म उभिन त्यसरी
जसरी आजसम्म लाखौं मानिसहरु उभिए
चुपचाप र बसे विवश शान्त शालिन मुद्रामा
हाँस्दै फिस्स जबर्जस्तीको हाँसो ।
अहँ पर्दैन पखाल्न मेरा पापहरु
तिम्रा चोखा पानीका थोपाहरुले
हुन्नन् मेरा खुट्टाहरु पनि पवित्र
तिम्रा खडकुलाका आहालहरुमा डुबाएरपनि
मर्दैनन् मेरा पापहरु छर्कदैमा
तिल, जौ र कुशका अभिषेकहरुले।
अहँ सक्दिन म मेरा खुट्टाहरु घन्टौसम्म
कसैको नियन्त्रणमा बुझाउन
न त सक्छु मेरा कठोर हात खुट्टाहरु एकैछिन
तिम्रा कोमल हातका स्पर्शहरुमा समर्पण गर्न नै ।
अहँ सक्दिन म उभिन त्यसरी
जसरी आजसम्म लाखौं मानिसहरु
उभिए बसे चुपचाप चुपचाप शान्त शालिन
अहँ सक्दिन म उभिन त्यसरी।
मिलाएर कपालको बिन्यास
सजाएर जीउभरी कपडा
टल्काएर बजारको महँगो जुत्ता
अहँ सक्दिन म गलामा झुन्ड्याउन सुनको सिक्री र
बन्न सक्दिनँ म सामन्त समाजको साक्षी
मुख्याच्या अर्को।
मलाई सहनै गाह्रो पर्छ कसैको अभाव खोसेर
निधारमा टास्न रातो टीका
म सक्दिनँ कसैको निन्द्रा ब्युझने गरी
बजाउन सस्कृतिको बाजा
नचाउदिन गाउँ नै बेसुरमा आधा रातसम्म
अनिदा आखाहरुका खोस्न सक्दिनँ प्रीय निन्द्रा
मलाई त म जागेर अरुहरु निदाएको खुब मनपर्छ
सक्दिनँ म म ब्युझिएर मसँगै अरुहरुलाई ब्युँझ्याउन
आधा रातहरुसम्म त्यसरी
जसरी आजसम्म लाखौं मानिसहरु
उभिए र बसे चुपचाप बनेर रमिते कसैको।
कसैको नजरमा बारम्बार पर्दै हट्दै छेलिदै
नियालिदै अहँ सक्दिन म पर्न निशानामा एकछिन कसैको।
ए ! मानिसहरु हो ! यो समाज हेर्ने देख्ने सुन्ने र
बोल्नेहरुको मात्र रहेछ
बुझ्ने र सोच्नेहरुको भिड भए पो लिएर
आउनु जन्तीहरुको हुल
अहँ मेरा लागि पक्ष बनाएर एकैछिन
ल्याउन सक्दिन म यी मानिसहरुको भिड
अहँ गर्न सक्दिन म आफैलाई मारेर
दुनियाँलाई देखाउने बिहे
अहँ गर्न सक्दिन म आफू रोएर सारालाई हसाउने बिहे।
ओ ! समाज सक्छस् भने मैले मेरो बन्ने जीवन साथीलाई
माटोको सिन्दुर लगाइदिएकै बेला
शुभकामना दिन
लिएर आइज दुई थुङा फुल स्नेहको
बाडेर जा खुसी जीवनभर आनन्दको
छाडेर जा आशिर्वाद सम्पन्नताको
र भनिदे सबैलाई बिहे
आफ्ना लागि गर्ने हो
अरुका लागि होइन भनेर।