अब स्मृतिमा प्रेमध्वज प्रधान
नेपाली संगीतका सुमधुर आबाज प्रेमध्वज प्रधानको हामीसँग अब स्मृतिमात्र छ। मखमली आबाजका धनी प्रधानको बिहीबार निधन भएसँगै नेपाली संगीतको एक युगको अन्त्य भएको छ। नेपालमा प्रजातन्त्र प्राप्तिसँगै रेडियो स्थापना भएपछि रेडियो नेपालबाट गुन्जिएको पहिलो मखमली आबाज थियो, प्रेमध्वजको।
आफ्नी आमा प्राणदेवी प्रधानको प्रेरणाले नेपाली सुगम संगीतमा प्रवेश गरेका प्रेमध्वजले निरन्तर छ दशक नेपाली संगीतमा अतुलनीय योगदान दिए। गीतमा आधुनिकता र शब्दमा माधुर्य प्रस्तुत गर्ने पहिलो पुरुष गायकको रूपमा प्रधानलाई लिइन्छ। उनले उस्ताद गणेशलाल श्रेष्ठसँग संगीतको लय र ताल सिकेर आफूलाई सरल गायनमा सुशब्द बनाए।
निजी क्षेत्रबाट बनेको पहिलो नेपाली चलचित्र माइतीघरका निम्ति पहिलो पटक पाश्र्वगीत गाउने प्रेमध्वज नै पहिलो नेपाली गायक हुन्, जसले बलिउडका प्रसिद्ध संगीतकार जयदेवको संगीतमा मंगेशकर परिवारकी कुशल गायिका उषा मंगेशकरसँग युगल गीत गाए। चलचित्र माइतीघरपछि उनले फिल्ममा पहिलो पटक डेब्यु गरेका नायक शिव श्रेष्ठका निम्ति जीवन रेखामा आफ्नो स्वर दिए।
