नेपाली कांग्रेस यति पुरानो पार्टी भएर पनि यसले के गर्यो भन्ने प्रश्न निरन्तर उठिरहन्छ। कांग्रेसलाई सामन्तहरुको पार्टी भन्ने आरोप पनि लाग्दै आएको छ। तर, यसमा कुनै तथ्य छैन। विशेष गरी निर्वाचनमा विपक्षी पार्टीले यस्तो निराधार प्रचार गर्दै आएका छन्।
अहिलेको हाम्रो पुस्ता लोकतन्त्रमै हुर्केको भएर होला आफूसँग भएको स्वतन्त्रताको मूल्य र त्यसको महत्त्वबारे एक हिसाबले अनभिज्ञजस्तै रह्यो। यो पुस्तालाई कहिल्यै अहिले पाइरहेको स्वतन्त्रताको मूल्य ठूलो लागेन। अघिल्लो पुस्ताको वलिदानीबाट प्राप्त भएकाले होला हामीलाई यस्तो महसुस भएको। आमा–बाबुको मेहनत र पसिनाबाट थालमा पस्किएको खानामा खोट खोजे झैं हाम्रो पुस्ताले लोकतन्त्रमा पनि खोट खोजिरहेको छ। त्यही कारण हो नेपाली कांग्रेस र लोकतन्त्रबारे पनि उतिविधि चासो बढेको देखिँदैन। कांग्रेस किन र केका निम्ति आवश्यक छ भन्ने कुरा नै हाम्रो पुस्ताले बुझ्न चाहेको देखिँदैन।
भर्खर ३० वर्ष काटेको एउटा युवा हुनुको नाताले मैले पनि स्वतन्त्रता सहजतामै पाएको छु। मेरा लागि प्राप्त स्वतन्त्रता भनेको आमा–बुवाको मेहनतबाट आर्जित ‘थालमा पस्किएको खाना’को स्वादजस्तै भएको छ। यति हुँदाहुँदै पनि मलाई यो स्वतन्त्रता कसले दिएको हो भन्ने थाहा छ। नेपाली कांग्रेस नागरिक स्वतन्त्रता, बहुलवाद, भयमुक्त समाज र धार्मिक स्वतन्त्रताका निम्ति जन्मेको राजनीतिक दल हो। अहिले नेपाली राजनीतिमा चर्चित यी शब्दावलीलाई राष्ट्रिय मुद्दाका रुपमा स्थापित गर्न कांग्रेसले ठूलो त्याग र वलिदान गरेको छ। समकालीन राजनीतिक परिदृश्य एवम् घटनाक्रमले यो यथार्थलाई थप स्पष्ट पारेको तथ्य युवा पुस्ताले बुझ्नु जरुरी छ।
