भूमि व्यवस्था तथा सहकारी मन्त्री डा. शिवमाया तुम्बाहाम्फेले बैशाखमा हुने निर्वाचनका लागि सरकारले तयारी सुरु गरेको बताएकी छिन्। निर्वाचन हुँदैन भन्ने भ्रम फैलाउनु देशमा शान्ति कायम नहोस् भन्ने शक्तिको काम भएकाले यसमा विश्वास गर्न उनले आग्रह गरिन्।
विराटनगरमा सोमबार बिहान सञ्चारकर्मीसँग कुरा गर्दै मन्त्री तुम्बाहाम्फेले सरकारले निर्वाचन घोषणा गरेको मितिमा निर्वाचन गर्न आयोगले आफ्नो तयारी सुरु गरेको उनले बताइन्।
‘निर्वाचन हुँदैन भन्ने आंशका धेरैमा छ, तर, निर्वाचन हुन्छ, त्यसका लागि सबै निकाय लागेका छन्’, उनले भनिन्, ‘सरकारले आर्थिक व्यवस्थापन सुरु गरिसकेको छ।’
बहुमत प्राप्त सरकार गठन गर्दै काम गर्दा पनि बारम्बार आफ्नै पार्टी भित्रबाट अवरोध भएकाले प्रधानमन्त्रीले प्रतिनिधिसभा विघटन गर्न बाध्य भएको मन्त्री तुम्बाहाम्फेको भनाइ छ।
उनले भनिन्, ‘एक समय नागरिकले चाहेर दुई पार्टी मिलेर सरकार चालएको हो, तर त्यस भित्र काम गर्न नदिने क्रम सुरु भयो, सरकारले सोचे जस्तो काम गर्न सकेन, त्यसैले अबको आवश्यकता कस्तो सरकार र पार्टी हो भन्ने ताजा जनादेश आवस्यकता भएकाले निर्वाचनमा जाने तयारी गरिएको हो।’
