प्रधामन्त्रीको सिफारिसमा राष्ट्रपतिले प्रतिनिधिसभा विघटन गरेपछि नेपालको राजनीति नयाँ मोडतर्फ उन्मुख छ। संसद विघटनविरूद्ध एकाध बाहेक सम्पूर्ण शक्तिहरु एक ठाउँमा उभिएका छन्। नेकपाभित्रको बलियो घटक पुष्पकमल दाहाल ‘प्रचण्ड’ र माधव कुमार नेपाल समूह, नेपाली कांग्रेस, जनता समाजवादी पार्टी (जसपा) नेपालजस्ता राजनीतिक शक्तिहरुले सरकारको पछिल्लो कदमलाई असंवैधानिक तथा अलोकतान्त्रिक भनिसकेका छन्। यस्तै, संवैधानिक कानुनका जानकार, नागरिक समाज, राजनीतिक विश्लेषकहरुले पनि प्रधानमन्त्रीको पछिल्लो कदमलाई असंवैधानिक भनेका छन्।
माथि उल्लेख गरिएका प्रायः सबै शक्तिहरु सडकमा आइसकेका छन्। तर, फरक–फरक एजेण्डामा। नेकपा असन्तुष्ट पक्षले संसद पुनःस्थापनाको एजेण्डा बोकेको छ भने नेपाली कांग्रेस अन्योलमा छ।
संसद विघटन भएको भोलिपल्ट पुस ६ गते कांग्रेस पार्टी कार्यालय सानेपामा सर्वदलीय बैठक बस्यो। प्रतिनिधिसभा विघटनको विरोधमा आगामी रणनीति तय गर्न नेपाली कांग्रेसले बोलाएको सर्वदलीय बैठकले महत्वपूर्ण निर्णय गर्ने अपेक्षा गरिएको थियो। तर, नतिजा शून्यजस्तै देखियो। दलहरुको फरक मत भएकै कारण ठोस निर्णय हुन नसकेको स्रोत बताउँछ। कांग्रेसले संसद विघटनलाई असंवैधानिक भनेपनि संसद पुनःस्थापनलाई जोड दिएको छैन। उसले कम्युनिस्ट विभाजित भएको अवस्थामा चुनावमा गएर जित्ने रणनीतिलाई उपयुक्त ठानेको स्रोतको दाबी छ। ‘अहिलेको अवस्थामा चुनावमा गए जितिन्छ भन्ने रणनीतिमा कांग्रेस छ, विशेषगरि पार्टी सभापतिले त्यसमा जोड दिइरहनुभएको छ’ स्रोतले भन्यो,‘तर, कांग्रेसभित्रैको एक खेमा संसद पुनःस्थापनालाई मुख्य एजेण्डा बनाएर आन्दोलन गर्नुपर्ने बताइरहेको छ।’
