डोनाल्ड ट्रम्प हारे। उनी हार्नुपर्ने कारणबारे विश्लेषण छापिए। विश्वका ठूला मिडियादेखि सामाजिक सञ्जालहरूमा, ट्रम्प प्रवृत्तीको समर्थन कम, विरोध ज्यादा देखियो।
विरोध गर्नेहरूमध्ये एक थिए साझा पार्टी संयोजक रवीन्द्र मिश्र। उनले ट्रम्प र वाइडेनबीच कडा प्रतिस्पर्धा हुनुलाई 'अचम्म'को संज्ञा दिए। ट्रम्प वाइडेन बराबर नहुनुपर्ने कारणहरूको सूची ट्वीट गरे। जसमध्य एक थियो – ट्रम्पकोदुई महिलासँग डिभोर्स हुनु।
उक्त ट्वीट पढेपछि विश्वास गर्न गाह्रो भयो। तर, पनि प्यारोडी अकाउन्ट पो हो कि? भन्ने शंकामा प्रोफाइल खोलेँ। होइन,रवीन्द्र मिश्रकै अकाउन्ट रहेछ।
मानभवनस्थित एउटा क्याफेमा थिएँ त्यतिखेर। टाइमलाइन स्क्रोल गर्दैगर्दा मिश्रको ट्वीट पढिसकेपछि दिमागमा प्रश्न खेल्यो, ओठमा हाँसो।
सँगै थिइन् आकांक्षा गुरुङ।
सोधिन्,'किन हाँसेको?'
उनलाई कारण बताइँन। डिभोर्सकै कारण भारतबाट नेपाल आएकी उनलाई भन्न सकिँन –हाम्रो देशका राजनीतिज्ञ महाअभियोग, यौन दुर्व्यवहारको आरोप र डिभोर्सलाई एउटै तखतामा राखेर हेर्छन्। मिश्रहरू त्यो कलंकरहित समाज निर्माणको भाषण गर्दैछन् जहाँ उनीजस्ता आकांक्षाहरू सम्बन्ध विच्छेद पछि पनि सम्मानित जीवन जिउन पाउनेछन्।
उनलाई आफू हाँस्नुको कारण ढाटेँ– एकजना नेताले ट्वीट गरेका रहेछन्। तथ्याङ्कको स्रोत 'द न्यूयोर्कर' हुनुपर्नेमा'न्यूयोर्क टाइम्स' लेखेछन्।
आकांक्षा मसँगै हाँसिन्। उनी रवीन्द्र मिश्र चिन्दिनन्। उनले के लेखे त्यो पनि थाहा छैन। तर,उनी स-साना कुराहरूमा रमाउन सिक्दैछिन्। सम्बन्ध विच्छेदपछि खुशीछिन् उनी।
