यात्रु : सिट छ भनेर क्याबिनको टिकट किन दिनुभयो?
काउन्टरवाला : सिट छ तर, क्याबिनमै जानुस् न भैहाल्छ नि!
यात्रु : हिजो सिटको टिकट काट्ने अहिले क्याबिनमा जा भन्ने! मलाई पैसा फिर्ता चाहियो!
काउन्टरवाला : क्याबिनमा जाऊ बैनी अहिले त्यस्तै छ, अवस्था मिलाएर गरौं!
यात्रु : क्याबिनमा पनि मान्छे छन्, मलाई पैसा फिर्ता चाहियो। त्यति टाढासम्म यत्रो पैसा तिरेर मरिमरी जानु छैन!
...
काठमाडौं गोंगबुमा यात्रु र काउन्टरवालाबीच भनाभन भइरहेको थियो।
उनले शनिबार काठमाडौंबाट जुम्लासम्मको टिकट काटेकी थिइन्।
काउन्टरवालाले डिलक्स बसमा सिट छ भनेर दिएको टिकट उनी बसपार्क पुगेपछि नर्मल पाइयो। अनि बस्ने पनि क्याबिनमा।
काठमाडौंदेखि जुम्लासम्मको भाडा अहिले ४ हजार २ सय ५० रुपैयाँ छ।
उनी बारम्बार त्यत्रो पैसा तिरेर क्याबिनमा कोच्चिएर जान सकिँदैन भनेर काउन्टरवालालाई भनिरहिन्।
केहीबेरको भनाभनपछि उनले पैसा फिर्ता पाइन्।
‘ठगहरू...!’ भन्दै उनी बसपार्कबाट बाहिरिइन्।
