नेपाल विद्युत् प्राधिकरणका प्रवन्ध निर्देशक कुलमान घिसिङको चार वर्षे कार्यकाल सकिन अब २० दिन मात्रै बाकीँ छ। सरकारले फेरि नियुक्ति नगरेको खण्डमा प्रवन्ध निर्देशक पदबाट घिसिङ स्वतः आफ्नो पदावधि सकाएर घर फर्किदैछन्। दैनिक १४ घण्टे लोडसेडिङ अन्त्य गरेर जनतामाझ लोकप्रिय बनेका कुलमानले चार वर्षे अवधिमा लोडसेडिङ मात्रै अन्त्य गरेनन्, कर्मचारीलाई मासिक तलब खुवाउन समेत सरकारको मुख ताक्नुपर्ने अवस्थामा पुगेको प्राधिकरणलाई अहिले वार्षिक ११ अर्बभन्दा धेरै नाफा कमाउने सवैभन्दा ठूलो सार्वजनिक संस्थाको रुपमा स्थापित गराउन सफल भएका छन्।
तत्कालिन ऊर्जामन्त्री जनार्दन शर्माको सिफारिसमा २०७३ भदौं २९ गतेको मन्त्रिपरिषद्को बैठकले प्राधिकरणको प्रवन्ध निर्देशकमा घिसिङलाई नियुक्त गरेको थियो। घिसिङले प्राधिकरणको नेतृत्व सम्हाल्नु अघिसम्म मुलुकमा दैनिक १४ घण्टाभन्दा धेरै लोडसेडिङ हुन्थ्यो। अझै रोचक त प्राधिकरणले तिहारको अवसरमा झिलिमिली उत्सव बत्ती नबाल्नु भनेर उपभोक्तालाई सार्वजनिक सूचना नै प्रकाशन गरेर उर्दी जारी गर्थ्यो। प्राधिकरणले माग अनुसारको विद्युत आपूर्ति गर्न नसकेको लाचारी व्यक्त गर्दै सार्वजनिक सूचना नै जारी गरेर तिहारको उत्सव बत्ती नबाल्न उपभोक्तालाई अनुरोध गर्थ्यो।
