गोकुल जोशी
सुदूरपश्चिममा आइतवारदेखि गौरा पर्व सुरु भएको छ। गौरा पर्व सुरु भए पनि कोरोना महामारीको त्रासले बिगतका वर्ष जस्तो चाडको चहलपहल भने यस वर्ष छैन्।
यस पर्वको पहिलो दिन आइतवार पञ्चमीका दिन महिलाले बिहानै स्नान गरी घर घरमा बिरुडा राखेका छन्।
पञ्चमीका दिनदेखि घर घरमा बिरुडा राखेर गौरा पर्व सुरु हुने भीमदत्त नगरपालिका–१८ की कृष्णा भट्टले बताइन।
‘कोरोना महामारीले गर्दा यसपालीको गौरा पर्व खल्लो भएको छ। घरबाहिर मठमन्दिरमा भीडभाड छैन्,’ उनले भनिन्, ‘घरभित्रै परिवारका सदस्य मिलेर मनाउँदै छौँ।’
घरको एक कोठामा गाईको गोबरले लिपेर तामापितलका भाँडाको बाहिरपट्टि पाँच ठाउँमा गाईको गोबर र दुबो लगाइ टिका र अक्षताले सिङ्गारेर धुपबत्तीबालेर पञ्च अन्न गहुँ, मास, गहत, गोरस र कलौ भिजाएर राखेर भगवन महेश्वरको आह्वान गर्ने कार्यलाई बिरुडा भनिन्छ।
