२५ साउन, काठमाडौं । अहिले बालुवाटारबाट भगवान श्रीरामको बहस सुरु भएको छ । तर, उनै भगवानका नाममा खुलेको ‘श्रीराम चिनी उद्योग’ बन्द छ । नेपालका उखु किसानहरु मारमा पर्दैछन् । मिठाई पसलेहरुले अहिल्यै चिनीको अभाव महसुस गर्न थालिसके, दशैंसम्म चिनीको मूल्य कति चुलिएला ?
रौतहटको गरुडामा रहेको श्रीराम सुगर मिलको भित्तोमा साउन ११ गते एउटा सूचना टाँसियो– हरेक बर्ष घाटामा गएको र अन्य बाध्यात्मक परिस्थितिका कारण १३ गतेबाट चिनी मिल स्थायीरुपमा बन्द गर्ने निर्णयमा कम्पनी सञ्चालक समिति पुगेको छ ।
हरेक आर्थिक वर्ष करोडौं रुपैयाँ घाटामा गएर कम्पनी जर्जर भएको र चाहेर पनि उद्योग सञ्चालन गर्न नसकिएको तथा किसानलाई बक्यौता तिर्न नसकिएको सूचनामा जनाइएको थियो ।
आर्थिक वर्ष (आब) ०७५/७६ सम्म कम्पनीलाई दुई अर्ब १७ करोड ७५ लाख ५८ हजार ३७६ रुपैयाँ नोक्सान रहेको र चार महिनादेखि कर्मचारीलाई तलब दिन नसकिएको व्यहोरा सूचनामा उल्लेख छ ।
३७५ जना स्थायी मजदुर र एक सयजना करार कर्मचारी कार्यरत २६ वर्ष पुरानो चिनी मिल औपचारिकरुपमा साउन १३ गतेबाट बन्द भएको हो ।
