मलेशियामा कार्यरत एक नेपाली युवालाई सुपरभाइजरले निर्घात कुटपिट गरेको भिडियो सामाजिक सञ्जालमा भाइरल भएपछि त्यो घटनाबारे अहिले मलेशियाको प्रहरीले अनुसन्धान गरिरहेको छ।
उक्त भिडियोमा सुपरभाइजरले लाठी र मुड्कीले सुरक्षागार्डलाई कुटिरहेको र ती गार्ड केही बोल्न नसकेको देखिन्छ। क्लालम्पुरस्थित एक भवनको पार्किङ क्षेत्रमा भएको कुटपिटको घटनाबारे प्रहरीले अनुसन्धान शुरू गरेको मलेशियाका सञ्चारमाध्यमहरूले जनाएका छन्।
अहिले विभिन्न सञ्चार माध्यमबाट मलेशियास्थित नेपाली राजदूतावासलाई उद्धृत गर्दै नेपाली कामदार कुटिएको भिडिओमा कुट्ने व्यक्ति पनि नेपाली नै भएको दाबी गरिएको छ। नेपाली दूतावासले सोमबार विज्ञप्ति जारी गरेर कुटपिटको घटनामा पीडित र पीडक दुवै व्यक्ति नेपाली भएको पुष्टि भएको जनाएको छ।
विज्ञप्ति अनुसार, कुटिने व्यक्ति नवलपरासीका इस्लाम हुसेन हुन् भने कुटपिट गर्ने कपिलस्तुका रामगोपाल मुराउ हुन्। पिट्ने व्यक्तिलाई मलेशिया प्रहरीले नियन्त्रणमा लिएको दूतावासले जनाएको छ।
मलेशियाको प्रहरीले उक्त कुटपिटमा नेपाली कामदार संलग्न भएको भन्दै यसअघि नै ‘स्टेटमेन्ट’ जारी गरिसकेको छ।
