कोरोना संक्रमित जगदम्बा इन्टरप्राइजेज प्रालि वीरगञ्जका प्रमुख कार्यकारी अधिकृतको गए राति मृत्यु भएको छ।
५६ वर्षीय सिइओको राति साढे ११ बजे गण्डक अस्थायी कोभिड अस्पतालमा मृत्यु भएको हो। भारत निवासी उनी पुरानो मुटुरोगी भएको अस्पताल प्रशासनले जनाएको छ।
साउन ७ गते उनलाई अस्पतालमा उपचारका लागि भर्ना गरिएको थियो। हिजो दिउँसोदेखि अक्सिजनको मात्रा शरिरमा कम भएपछि भेन्टिलेटरमा राखेर उपचार गराइएको अस्पतालका वरिष्ठ फिजिसियन डाक्टर निरजकुमार सिंहले बताए।
‘स्वास्थ्य अवस्था केही बिग्रिएपछि भेन्टिलेटरमा सारिएको थियो। तर उपचार गर्दागर्दै बचाउन सकिएन,’ उनले भने।
उनको शव अहिले अस्पतालमै राखिएको छ।
वीरगञ्जमा बिहीबार नै नगवा निवासी ३५ वर्षीय पुरुष र छपकैया निवासी ६५ वर्षीय पुरुष मृत्यु भइसकेको छ। यसबाहेक बुधवार नेशनल मेडिकल कलेज तथा शिक्षण अस्पतालमा उपचारार्थ ७० वर्षीय र नारायणी अस्थायी कोरोना अस्पतालमा उपचारार्थ ६८ वर्षीय वृद्धको मृत्यु भएको भएको थियो।
