पुँजी बजारमा करिब ६ अर्ब रुपैयाँको आइपीओ आउने भएको छ । नेपाल धितोपत्र बोर्डका अनुसार यतिबेला कुल ५ अर्ब ८४ करोड ९१ लाख ४१ हजार २२० रुपैयाँ बराबरको साधारण सेयर (आइपीओ) बिक्री खुला गर्ने तयारी गरिएको छ ।
कुल ५ करोड ८४ लाख ९ हजार ८७१ कित्ता सेयर बिक्री गर्न लागिएको हो । त्यसमध्ये १० जलविद्युत् कम्पनीले साधारण सेयर बिक्रीका लागि बोर्डसमक्ष अनुमति मागेका छन् । यस्तै ४ बिमा कम्पनी, अन्य समूहका ३ कम्पनी, मर्चेन्ट बैंक र लघुवित्तका १–१ कम्पनी रहेका छन् ।
चार बिमा कम्पनीको पनि आइपीओ आउँदै
बोर्डका अनुसार जनरल इन्सुरेन्स कम्पनी नेपालले ३० करोड बराबरको ३० लाख कित्ता सेयर बिक्रीको माग गर्दै यही असार ५ गते बोर्डमा आवेदन दिएको छ । यस कम्पनीको सेयर बिक्री प्रबन्धकमा एनआइबीएल एस क्यापिटल लिमिटेड रहेको छ । यता, सानिमा जनरल इन्सुरेन्सले पनि ३० करोड बराबरको ३० लाख कित्ता साधारण सेयर बिक्री माग गर्दै यही असार १४ गते आवेदन दिएको छ ।
यस कम्पनीको सेयर बिक्री प्रबन्धकमा एनआइसी एसिया क्यापिटल रहेको छ । त्यस्तै, आइएमई लाइफ इन्सुरेन्स कम्पनीले ६० करोड बराबरको ६० लाख कित्ता सेयर बिक्रीको माग गर्दै यही असार २२ गते बोर्डमा आवेदन दिएको छ । यस कम्पनीको बिक्री प्रबन्धकमा सिभिल क्यापिटल मार्केट लिमिटेड रहेको छ । यस्तै, रिलायन्स लाइफ इन्सुरेन्स कम्पनीले ६३ करोड बराबरको ६३ लाख कित्ता साधारण सेयर बिक्रीको माग गर्दै बोर्डमा आवेदन दिएको छ । यस कम्पनीको सेयर सानिमा क्यापिटलले बिक्री गर्नेछ ।
बोर्डका अनुसार हिमालयन हाइड्रोपावर लिमिटेडले २२ करोड ५० लाख बराबरको २२ लाख ५० हजार कित्ता र विन्दाबासिनी हाइड्रोपावर कम्पनीले पनि २५ करोड बराबरको २५ लाख कित्ता सेयर बिक्रीका लागि आवेदन दिएका छन् । त्यस्तै, रुरु जलविद्युत् परियोजनाले ८ करोड ९६ लाख ९५ हजार २२० बराबरको ८ लाख १५ हजार ४११ कित्ता साधारण सेयर बिक्रीका लागि आवेदन माग गरेको छ ।
शुभम् पावर लिमिटेडले ५ करोड ८० लाख ५८ हजार बराबरको ५ लाख ८० हजार ५८० साधारण सेयर बिक्रीको अनुमति मागेको छ । सीइडीबई हाइड्रोपावर कम्पनीले २५ करोड १८ लाख २३ हजार बराबरको २५ लाख १८ हजार २३० कित्ता, तेह्रथुम पावर कम्पनीले १२ करोड बराबरको १२ लाख कित्ता, मध्यभोटेकोशी जलविद्युत् कम्पनीले एक अर्ब ५० करोड बराबरको एक करोड ५० लाख कित्ता साधारण सेयर बिक्री अनुमति माग्दै बोर्ड पुगेको छ ।
त्यसैगरी मैलुङ खोला जलविद्युत् कम्पनीले ७ करोड ३६ लाख २८ हजार ६०० बराबरको ७ लाख ३६ हजार २८३ कित्ता, माउन्टेन इनर्जी नेपालले ३९ करोड ३६ लाख ५ हजार ४०० बराबरको ३९ लाख ३६ हजार ५४ कित्ता आइपीओ अनुमति मागेको छ । यस्तै, ग्रिनलाइफ हाइड्रोपावर लिमिटेडले ३४ करोड ९६ लाख ४० हजार बराबरको ३४ लाख ९६ हजार ४०० कित्ता र सिंगटी हाइड्रो इनर्जी लिमिटेडले ४३ करोड ५० लाख बराबरको ४३ लाख ५० हजार कित्ता साधारण सेयर बिक्रीका लागि अनुमति मागेको छ ।
यस्तै, सीबीआइएल क्यापिटल लिमिटेडले ३ करोड बराबरको ३ लाख कित्ता र समाज लघुवित्त वित्तीय संस्थाले ८६ लाख बराबरको ८६ हजार कित्ता साधारण सेयर बिक्रीको तयारी गर्दै बोर्डबाट अनुमति मागेको छ । अन्यतर्फका २ कम्पनीमा चन्द्रागिरि हिल्स लिमिटेड र इमर्जिङ नेपाल लिमिटेड छन् । चन्द्रागिरि हिल्सले १८ करोड ४० लाख ९१ हजार बराबरको १८ लाख ४० हजार ९१० कित्ता र इमर्जिङ नेपालले ५ करोड बराबरको ५ लाख कित्ता साधारण सेयर बिक्रीका लागि अनुमति मागेको छ ।
बोर्डले चालु आवमा कुल ९ कम्पनीका ३ अर्ब ९९ करोड ४८ लाख ४ हजार बराबरको ३ करोड ९९ लाख ४८ हजार ४० कित्ता साधारण सेयर बिक्रीका लागि अनुमति दिइसकेको छ । त्यसमा शिवश्री हाइड्रोपावर लिमिटेड, एनआरएन इन्फ्रास्टक्चर एण्ड डेभलेपमेन्ट लिमिटेड, नेपाल पुनर्बीमा कम्पनी, लिवर्टी इनर्जी, युनाइटेड इदिमर्दी एण्ड आरबी हाइड्रोपावर लिमिटेड रहेका छन् । यस्तै, केही दिनअघि मात्रै एनआइसी एसिया लुघवित्त वित्तीय संस्थाले साधारण सेयर बिक्री गरेको थियो ।
यस कम्पनीको सेयर नेपाल स्टक एक्सचेन्जमा समेत सूचीकृत भई कारोबार समेत सुरु भइसकेको छ । यस कम्पनीले ४७ करोड ५५ लाख बराबरको ४७ लाख ५५ हजार कित्ता सेयर सर्वसाधारणलाई बाँडफाँड गरेको थियो । यस्तै, साधना लघुवित्त वित्तीय संस्था लिमिटेडले ७ करोड ७ लाख ८० हजार बराबरको ७ लाख ७ हजार ८०० कित्ता साधारण सेयर बिक्री गरेको छ । सो कम्पनीको साधारण सेयर बाँडफाँड हुन बाँकी छ ।
यस्तै, अजोड इन्स्योरेन्स लिमिटेडको साधारण सेयर हाल बिक्री भइरहेको छ । यस कम्पनीको ३० करोड बराबरको ३० लाख कित्ता सेयर बिक्री भइरहेको छ । उक्त कम्पनीको सेयर बिक्री प्रबन्धकमा एनआइबीएल एस क्यापिटल रहेको छ । बोर्डले माउन्टेन इनर्जी नेपाललाई आयोजना प्रभावित र सर्वसाधारणलाई साधारण सेयर बिक्रीका लागि अनुमति दिएको छ । बोर्डले आयोजना प्रभावित र सर्वसाधारणका लागि समान १९ लाख ६८ हजार २७ कित्ता सेयर बिक्रीको अनुमति दिएको छ । - रासस
