नरेश फुयाँल
कोरोनाको जोखिमका कारण सरकारले गरेको लकडाउनकै बीचमा गायक हेमन्त शर्माले तीनवटा गीत रेकर्ड गरे । उनको अर्को एउटा गीत एरेन्जका क्रममा बीबी अनुरागीको प्रिज्म डिजिटल रेकर्डिङ स्टुडियोमा छ । अनुकूल समय पारेर केही दिनमा उक्त गीत पनि रेकर्ड गर्ने तयारीमा छन् हेमन्त ।
“अब विस्तारै समय अनुकूल पारेर रेकर्डिङ गर्नुपर्छ । स्रोता दर्शकले नबिर्सिउन् भनेर पनि गीत लिएर आउनुपर्ने बाध्यता छ,” उनी भन्छन् ।
गायक सत्यराज आचार्य पनि गीत गाउन स्टुडियो निस्किन थालेका छन् । पछिल्लो एक महिनामा उनले तीनवटा गीत रेकर्ड गरे । “सामाजिक दूरी कायम गर्दै पनि काममा निस्किनुपर्ने अवस्था छ । पक्कै पनि अवस्था सहज भइसकेको छैन । संक्रमणको जोखिम उत्तिकै छ । तर पनि आफैं सचेत भएर काम नगरी नहुने अवस्था आइसक्यो,” सत्यराज भन्छन्, “पहिला बाँकी रहेका र कलेक्सन एल्बमका गीत रेकर्ड गर्न थालेको छु । तर कसरी सुरक्षित हुँदै काम गर्ने भनेर आफैं सचेत हुनुपर्ने अवस्था छ ।”
आफ्नै लगानीमा सोलो एल्बम बजारमा ल्याइहाल्ने अवस्था भने तयार नभएकाले अझै पनि केही समय पर्ख र हेरको अवस्थामा रहेको उनी बताउँछन् ।
