आत्माराम पाण्डे
‘प्रचण्डपथलाई अँगालौं, जनयुद्धलाई सफल पारौं’ लेखिएको पुष्पकमल दाहाल र र डा. बाबुराम भट्टराईका फोटो अंकित पोष्टर, पर्चाहरू जताततै छरिएका हुन्थे। माओवादी जनअदालतबाट जिल्ला जनसरकार मार्फत जिल्लाका प्रशासन प्रमुख र प्रहरी प्रमुखलाई ‘डेथ वारेन्ट’ आउँथे।
जिल्ला कारागार माओवादी छापामारहरूले भरिएको थियो। विस्फोट, हिंसात्मक घटना नभएको दिन विरलै हुन्थ्यो । द्वन्द्वको त्रास र भयले स्थानीय विक्षिप्त र निराश देखिन्थे। सदरमुकाममा हमला हुँदैछ भन्ने हल्ला दिनहुँ चल्थ्यो । गोरखाका माथिल्लो र तल्लो दरबार आक्रमणको निशानामा छन् भन्ने सुनिन्थ्यो । राजतन्त्र समाप्त गरी गणतन्त्र ल्याउने जनयुद्धको उद्देश्य रहेको बताइन्थ्यो।
हनुमानढोका, पाटन, भक्तपुर, भरतपुरको दियालो बंगला र पोखराको रत्न मन्दिर लगायत देशका सबै दरबार राजा वीरेन्द्रले निजी सम्पत्तिको रूपमा राजकीय सम्पत्ति कोष विभागमा सुरक्षित राखिएको चर्चाले युद्धरत पक्ष आक्रोशित भएको अनुमान थियो। त्यसरी नै शिवपुरी, नागार्जुन र गोकर्ण वन क्षेत्र राजनिकुञ्जको रूपमा सूचीकृत भएको राजपत्रमा प्रकाशित सूचनाबाट जानकारी हुन्थ्यो।
