रुकुम पश्चिममा ६ जना युवकको हत्यामा संलग्‍न भएको आरोपमा प्रहरीले थप तीनजनालाई पक्राउ गरेको छ। प्रहरीले चौरजहारी नगरपालिका–८ सोतीबाट १९ वर्षीय घमण्ड मल्ल, विष्णु मल्ल र २६ वर्षीय सर्वजित भनिने सविन पुनलाई पक्राउ गरेको हो।

बुधबार राति पक्राउ परेका उनीहरुलाई जिल्ला प्रहरी कार्यालयमा ल्याइएको प्रहरी प्रमुख डीएसपी ठगबहादुर केसीले बताए। उनका अनुसार घमण्ड र विष्णु कर्तव्य किटानी जाहेरीमा परेका व्यक्ति हुन्।

उनका अनुसार थप ८ जनालाई पनि अनुसन्धानका लागि पक्राउ गरिएको छ।

मल्ल थरकी केटीसँगको प्रेम सम्बन्धलाई विवाहमा परिणत गर्न जाजरकोटबाट रुकुम पश्चिम गएका नवराज विकसहित ६ जनाको यही जेठ १० गते हत्या भएको छ।

जातको आधारमा विभेद गरी गाउँलेले युवाहरुको हत्या गरेको आरोप पीडित परिवारले लगाएका छन्। घटनामा संलग्न भएको आरोपमा चौरजहारी–८ का वडाध्यक्ष डम्मरबहादुर मल्ललाई पनि प्रहरीले थुनामा राखेको छ।