सरकारले बिहीबार आर्थिक वर्ष २०७७/७८को बजेट सार्वजनिक गरेको छ। अर्थमन्त्री डा. युवराज खतिवडाले संघिय संसदको संयुक्त बैठकमा १४ खर्ब, ७४ अर्ब, ६४ करोडको बजेट रुपैयाँको बजेट पेश गरे। बजेटबारे सत्ताापक्षिय नेकपा र प्रतिपक्षी नेपाली कांग्रेसका पूर्व अर्थमन्त्री र विज्ञको विचार यस्तो छ।
असाध्यै राम्रो र सन्तुलित बजेट
– विष्णु पौडेल, पूर्व अर्थमन्त्री तथा महासचिव नेकपा
बजेट संकटको परिस्थितीमा एकदम राम्रो आएको छ। अझ भनौ यो धेरै राम्रो छ। हामी कोभिड – १९ को विश्वव्यापी प्रकोपसँग जुधिरहेका छौं। यस्तो समयमा राजस्व, स्रोत व्यवस्थापन र विनियोजनमा स्वत चुनौति रहन्छ। यस्तो प्रतिकुल अवस्थामा पनि अधिकतम सिमासम्मको स्रोत व्यवस्थापन गर्ने, कोरोना प्रकोपको सामना गदै मुलुकको आर्थिक जीवनलाई गतिशिल तुल्याउने, रोजगारी सिर्जना गर्ने, उत्पादन वृद्धि गर्ने र समृद्धि हासिल गर्ने उदेश्य र योजनाका साथ बजेट आएको छ।
