प्रहरीले दुर्लभ वन्यजन्तु रेडपाण्डा (हाब्रे)को छालासहित चार जनालाई पक्राउ गरेको छ। पक्राउ पर्नेमा सिन्धुलीका सूर्यबहादुर भुजेल, धादिङका सुकबहादुर लामा, कास्कीका युवराज सापकोटा र काठमाडौंकी कमला तामाङ छन्।

महानगरीय अपराध अनुसन्धान महाशाखा, टेकुको टोलीले रेडपाण्डाको छाला अवैध ओसारपसारमा संलग्न भएको सूचनाको आधारमा उनीहरुलाई कपनबाट पक्राउ गरेको हो।

उनीहरुको शरीरमा खानतलासी लिने क्रममा दुर्लभ वन्यजन्तुको छाला फेला परेको एसएसपी सहकुलबहादुर थापाले बताए।

उनका अनुसार पक्राउ परेकाहरुलाई आवश्यक कारबाहीका लागि जिल्ला वन कार्यालय हात्तीसार पठाइएको छ।