तामाङ भाषाको शब्द ‘शैलुङ’को नेपाली अर्थ हुन्छ–सय थुम्का। धानको थुप्रो जस्ता दर्जनौं थुम्का। कुनै अग्ला त कुनै होचा। जुन थुम्कामा चढेर हेरे पनि सेताम्मे हिमाल देखिन्छन्। हिमाल पनि कति हुन् कति ! पश्चिमको अन्नपूर्ण, मनास्लु, लमजुङदेखि गणेश हिमाल, लाङटाङ, गौरीशंकर, सगरमाथा र नुम्बुरसम्म दर्जनौं हिमालहरू। एक टकले हेरिरहूँ जस्तो। क्यामेराले खिचिरहूँ जस्तो ! २२० डिग्रीमा हिमाली श्रृङ्खला।
दोलखा र रामेछापको साँधमा छ शैलुङ (३,१५० मिटर)। १० वर्ग किमिमा फैलेको शैलुङमा एक दर्जन सामुदायिक वन छन्। त्यहाँ १०८ भन्दा बढी किसिमका जडीबुटी पाइन्छ। साथमा किसिम किसिमका जनावर र चराचुरुङ्गी पनि।
