नेपालका लागि यो गर्वको विषय हो कि शर्मको ?
अमेरिकामा शरण माग्ने नेपालीको संख्या बढेसँगै नेपाली शरणार्थीको शरण स्वीकृत संख्या पनि बढ्दो छ । आर्थिक वर्ष २०१९ मा नेपाल अमेरिकामा शरण स्वीकृत हुने देशको नवौ स्थानमा उक्लिएको छ।
एक्ज्युकेटिव अफिस फर इमिग्रेसन रिभ्युले सार्वजनिक गरेको तथ्यांकअनुसार आर्थिक वर्ष २०१९ मा अमेरिकी अध्यागमन अदालतले ६ सय २५ नेपालीको शरण स्वीकार गर्ने फैसला गरेको छ भने दुई सय ४५ को अस्विकार गरेको छ ।
विवरणअनुसार शरण स्वीकृत हुनेमा सबैभन्दा बढी न्युयोर्कबाट तीन सय ७४ जना रहेका छन्। यसैगरी क्यालिफोर्नियाबाट एक सय ५७, टेक्सासबाट ५२, म्यासाचुसेट्सबाट १०, मेरिल्याण्डबाट ६ र कोलोराडोबाट दुईजनाको शरण स्वीकृत भएको जनाइएको छ।
अमेरिकाका शरण माग्ने नेपालीको संख्या बढ्नुलाई कसरी लिने- नेपालको सफलता या असफलता ? यो आफैंमा एक पेचिलो प्रश्न हो।
विवरणअनुसार शरण अस्विकार भएका दुई सय ४५ जनामा सबैभन्दा बढी न्युयोर्कबाट ९३ जना रहेका छन्। त्यसपछि क्रमश: क्यालिफोर्नियाबाट २३, टेक्सासबाट १४ र मेरिल्याण्डबाट पाँचजना रहेका छन्।
विवरणमा विभिन्न भिसाबाट अमेरिका आएर शरण माग्ने ५४ जना र मेक्सिकोको सिमाक्षेत्रबाट गैरकानुनी रूपमा प्रवेश गरेका एकसय ९१ जना नेपाली शरणार्थीको शरण स्विकृत गरिएको जनाइएको छ।
सन् २००१ यता अमेरिकाले चारहजार सातसय ३८ नेपालीलाई शरण दिइसकेको छ भने एकहजार आठसय ४० नेपालीको शरण अस्विकार गरेको छ । शरण स्वीकृत हुनेमध्ये एकहजार पाँचसय १२ मेक्सिकोको सिमाक्षेत्रबाट गैरकानुनी रूपमा प्रवेश गर्ने रहेका छन्।
यसरी अमेरिकाका शरण माग्ने नेपालीको संख्या बढ्नुलाई कसरी लिने- नेपालको सफलता या असफलता ? यो आफैंमा एक पेचिलो प्रश्न हो।
एकातिर यसबाट हजारौ नेपालीको अमेरिकी सपना साकार भएको छ भने अर्कोतिर नेपाल अमेरिकामा शरणार्थी निर्यात गर्ने विश्वकै नवौ देशको सूचीमा चढेको छ । व्यक्तिगत रूपमा फाइदै होला तर राष्ट्रिय रूपमा हेर्दा यसलाई गर्व गर्न लायक विषय भन्न सकिन्न।
